मेरो इतिहास मेटाएर – मनोज आठपहरिया

मेरो इतिहास मेटाएर
तिम्रो मात्र नलेखाएको भए
म पनि तिमीसँगै
फूलमाला लिएर उभिने थिएँ
एकताको दिवस मनाउने थिएँ

मेरो पुर्खालाई नरसंहार गरी
त्यसैको चितामा खुसियाली मनाई
बाँचेका पुर्खालाई
दास नबनाएको भए
तिमीसँगै उभिने थिएँ
एकताको दिवस मनाउने थिएँ

जितको उन्मादले मातेर
नाक, कानको धार्नी नपुराएको भए
अवोध नारीको अस्मिता नलुटिएको भए
तिमीसँगै उभिने थिएँ
एकताको दिवस मनाउने थिएँ

युद्ध नजितेकासँगको बाचा
तिम्रा सन्तानले नबिर्सिएको भए
लेखिएका सम्झौता
नतोडिएको भए
तिमीसँगै उभिने थिएँ
एकताको दिवस मनाउने थिएँ

आफू माथि रहन
आफ्नो भाषा, संस्कार आदि
अरुलाई नलादेको भए
तिम्रो जंगली असभ्य
हाम्रो सभ्य नभनेको भए
तिमीसँगै उभिने थिएँ
एकताको दिवस मनाउने थिएँ

बहुलतालाई स्वीकार नगरी
एक भाषा एक भेष
जबरजस्ति नलादेको भए
जगेर्ना नगरे नि
उपेक्षा नगरेको भए
तिमीसँगै उभिने थिएँ
एकताको दिवस मनाउने थिएँ

त्यसैले यो विभेदकारी
एकता दिवस
म मनाउन सक्ने छैनँ
अर्काको अस्तित्व स्वीकार नगर्ने दिवस
म मनाउने छैन
जबरजस्ती एकताको मालामा
म गाँसिने छैन ।
– कवि मनोज आठपहरिया ।